O equipo ourensán resolveu a eliminatoria cun segundo cuarto determinante, liderado polos 22 puntos de Jan Zidek e as 13 asistencias de Xabi Oroz. O próximo rival será o Palmer Basket, no Paco Paz.
O Club Ourense Baloncesto impúxose por 86-103 ao CB Prat no Pavelló Joan Busquets e selou o pase aos oitavos de final da Copa España. Nun encontro de ritmo alto e moita anotación, o conxunto de Moncho López soubo responder ao bo inicio local e marcou diferenzas antes do descanso para encamiñar a eliminatoria.
O CB Prat levou a iniciativa nos primeiros minutos, apoiado no seu dinamismo ofensivo, pero o COB atopou en Jan Zidek a súa principal referencia para manterse no partido. O checo anotou con eficacia tanto desde o perímetro como preto do aro, mentres Sean Russell e Xabi Oroz tamén contribuíron á reacción visitante. Nun primeiro cuarto no que os locais alcanzaron os 27 puntos, o equipo ourensán conseguiu darlle a volta ao marcador e pechar o período cunha mínima vantaxe (27-29).
O encontro rompeu no segundo cuarto. O COB mellorou a súa produción ofensiva e comezou a castigar a defensa local con distintas alternativas. Zidek, Toms Leimanis e Sean McDonnell sumaron puntos importantes, mentres Russell continuou facendo dano no ataque. A diferenza medrou ata os dezaseis puntos grazas a un parcial de 11-25, que deixou o marcador en 38-54 ao descanso.
Tras a pausa, o CB Prat volveu competir sen renunciar ao seu estilo e mantivo un elevado ritmo anotador. Os locais sumaron 26 puntos no terceiro cuarto, pero o COB atopou resposta nas accións de Zidek, Russell e Javi Nicolau para evitar que a vantaxe se reducise de maneira significativa. Os ourensáns afrontaron os últimos dez minutos cunha renda de dezaoito puntos (64-82).
No cuarto período, o intercambio de canastras mantivo a anotación elevada. Sergio Rodríguez destacou con novas achegas desde o perímetro, mentres Russell, Nicolau, Leimanis e Darío Pérez contribuíron a manter o caudal ofensivo visitante. O COB superou os cen puntos e pechou o encontro co definitivo 86-103.
Zidek rematou como máximo anotador do partido con 22 puntos, pese a reducir a súa participación por molestias físicas. Russell sumou 17 e Nicolau, 14, mentres Leimanis e Sergio Rodríguez tamén acadaron dobres díxitos. Na dirección do xogo destacou Xabi Oroz, que repartiu 13 asistencias e foi unha peza clave na creación de vantaxes para os seus compañeiros.
Coa clasificación asegurada, o COB xa ten a vista posta nos oitavos de final, nos que recibirá ao Palmer Basket no Pazo dos Deportes Paco Paz. A eliminatoria está prevista para os días 17 ou 18 de novembro, unha nova oportunidade para continuar avanzando na Copa España diante da súa afección.
Podes ver a rolda de prensa de Moncho López a continuación:
Fotos: Judit Conde
