O Club Ourense Baloncesto incorpora ao seu proxecto a Marc García, exterior catalán que chega a Ourense para reforzar o perímetro cun perfil que combina capacidade anotadora, experiencia ao máximo nivel e unha importante ameaza desde a liña de tres puntos.

García vén de completar a tempada 2025/26 na Orlen Basket Liga polaca, onde disputou 23 encontros repartidos entre o MKS Dąbrowa Górnicza e o Górnik Wałbrzych. Durante a campaña asinou unha media de 12,7 puntos, 3,9 rebotes e 0,7 asistencias en 25 minutos por partido, cun 36,1 % de acerto no lanzamento de tres puntos, superando os catro intentos por encontro, e un 87 % desde a liña de tiros libres.

A súa produción ofensiva estivo acompañada ademais por bos niveis de eficiencia. García rexistrou aproximadamente un 63 % de True Shooting (TS%) ao longo da tempada, mentres que o seu 3PAR situouse preto do 52 %, reflectindo o importante peso do lanzamento exterior dentro do seu xogo ofensivo.

O novo xogador do COB conta cunha ampla experiencia tanto na Liga Endesa como en competición europea, así como na actual Primeira FEB, competición que coñece perfectamente. Ao longo da súa traxectoria pasou por equipos como Fuenlabrada, Burgos e Río Breogán, ademais de vivir diferentes etapas no conxunto madrileño.

No seu paso polo baloncesto español, García deixou constancia da súa capacidade para xerar puntos tanto desde o perímetro como en situacións de un contra un, sendo un xogador capaz de atopar solucións ofensivas tanto dentro como fóra do sistema.

O exterior catalán conta tamén cun destacado palmarés nas categorías de formación. En 2016 foi MVP do Campionato de Europa U20, torneo no que España conquistou a medalla de ouro e no que García asinou unha media de 14,9 puntos por partido.

O adestrador do Club Ourense Baloncesto, Moncho, destacou a importancia da súa incorporación:

«Estamos moi contentos coa incorporación de Marc García. Falamos dun xogador contrastado, cunha traxectoria importante e, sobre todo, dun xogador que quere xogar aquí, algo que para nós ten moito valor.

Marc acumula unha ampla experiencia competitiva ao máximo nivel, tanto en ACB como noutras competicións europeas, e coñece tamén perfectamente a LEB Oro, actual Primeira FEB. Esa experiencia e coñecemento da competición achégannos un valor engadido.

Desde o punto de vista deportivo, reúne moitas das características que demandabamos para o noso xogo. É un xogador con moi boas lecturas tácticas, unha ameaza importante desde a liña de tres puntos e capacidade para xogar situacións de pick and roll, tanto para xerar os seus propios tiros como para crear vantaxes para o equipo. Ademais, demostrou ao longo da súa carreira unha gran facilidade para atopar puntos dentro e fóra de sistema, algo especialmente valioso.

A súa estatura, experiencia e versatilidade permítennos utilizalo tanto na posición de 3 como de 2 dentro do noso modelo de xogo. Cremos que a súa incorporación nos dá talento, ameaza exterior, lectura e recursos ofensivos, pero tamén un xogador que chega cunha enorme ilusión por formar parte do COB.»

Coa chegada de Marc García, o Club Ourense Baloncesto suma experiencia, talento e capacidade anotadora ao seu perímetro. Un xogador con coñecemento da competición, versatilidade para ocupar diferentes posicións e recursos para xerar puntos que se incorpora ao proxecto ourensán con ilusión e ambición.

Benvido ao COB, Marc!