O Club Ourense Baloncesto caeu por 79-83 ante o HLA Alicante no Pazo dos Deportes Paco Paz, nun encontro moi igualado que se decidiu nos últimos segundos. O conxunto de Moncho López chegou a dominar por dez puntos no terceiro cuarto, pero os visitantes reaccionaron tras o descanso e acabaron levando a vitoria nun final no que os ourensáns loitaron ata a última posesión.
O COB atopou en Martín Fernández o seu principal referente ofensivo nos primeiros compases. Os seus puntos permitiron aos locais manterse no partido nun inicio de alternancias, no que Sean McDonnell tamén achegou acerto desde o perímetro. Unha asistencia de Xabi Oroz para Martín Fernández permitiu aos ourensáns tomar a dianteira, e o acerto de Leimanis e un novo lanzamento exterior de Martín Fernández axudaron a pechar o primeiro cuarto cun axustado 16-16.
O segundo período mantivo a igualdade, pero o COB comezou a atopar máis recursos ofensivos. Zidek asumiu protagonismo, primeiro con dúas canastras consecutivas e despois cun triplo que devolveu a vantaxe aos locais. Tras un tempo morto de Moncho López, o conxunto ourensán mellorou tamén en defensa, provocando dificultades ao HLA Alicante para avanzar e xerando recuperacións importantes. McDonnell sumou desde a proximidade do aro e Zidek volveu castigar desde o perímetro. O COB conseguiu abrir unha pequena fenda no marcador e, co acerto de Martín Fernández desde a liña de tiros libres e unha nova canastra do propio xogador, marchou ao descanso cunha vantaxe de seis puntos (38-32).
Tras o paso polos vestiarios, o COB parecía disposto a dar un paso definitivo cara á vitoria. Martín Fernández volveu anotar e, pouco despois, asinou un espectacular triplo que fixo medrar a vantaxe local. Sean McDonnell colleu tamén o relevo ofensivo, cun novo lanzamento exterior e varias accións de penetración que permitiron aos ourensáns manter o control. Coa achega de Pinedo e outro triplo de McDonnell, o COB chegou a situarse dez puntos por diante (60-50). Porén, dúas perdas de balón nos últimos compases do período permitiron ao HLA Alicante recortar distancias e deixar o marcador en 60-56 antes do último cuarto.
O encontro entrou así nos dez minutos decisivos, nos que o HLA Alicante aproveitou o seu impulso para completar a remontada e poñerse por diante (60-62). Iglesias cortou a xeira visitante, pero os alacantinos volveron abrir unha pequena vantaxe. Leimanis e Sesma mantiveron o COB na loita, mentres que Pinedo achegou os locais ata o 73-75. A falta de 37 segundos, o propio Pinedo asinou un tapón decisivo que devolveu a posesión ao conxunto ourensán e mantivo vivas as opcións de vitoria.
O COB, con todo, non conseguiu aproveitar esa oportunidade e perdeu o balón nunha posesión que podía cambiar o desenlace. O HLA Alicante ampliou a diferenza ata o 73-77 e Moncho López pediu tempo morto para preparar a última reacción. Entón apareceu Leimanis cun triplazo que puxo o Pazo en pé e deixou os locais a só un punto (76-77), con 13 segundos por xogar. Tras o tempo morto visitante, os alacantinos anotaron desde a liña de tiros libres. Malia os intentos finais do COB, o HLA Alicante conseguiu pechar o encontro desde a liña de persoal para establecer o definitivo 79-83.
O Club Ourense Baloncesto quedou así sen premio nun partido que tivo momentos de dominio local. A reacción visitante e os detalles dos últimos minutos acabaron decantando un encontro no que os ourensáns loitaron ata o final. O COB deberá pasar páxina e seguir traballando para recuperar o camiño das vitorias na Primeira FEB.
Podes ver a rolda de prensa de Moncho a continuación:
