O Ourense Baloncesto pechou a súa preparación de pretempada cunha nova proba de nivel ante o Palencia, nun encontro igualado ata os últimos minutos no que o conxunto ourensán competiu ata o final. Malia a derrota, o equipo deixou boas sensacións e continúa avanzando na súa posta a punto de cara ao inicio da competición oficial.

Valentino Pinedo valorou positivamente o traballo realizado durante estas semanas e destacou a oportunidade de medirse a diferentes equipos e estilos de xogo durante a pretempada.

“A pesar dos resultados, hai cousas que mellorar, obviamente, pero estamos moi contentos co traballo”.

O xogador tamén se mostrou ilusionado ante o comezo da tempada e puxo en valor a química existente dentro do vestiario: “Creo que temos un bo equipo e moi boa química. Moitos dos xogadores españois xa xogamos xuntos e coñecemos moitos conceptos”.

Para Pinedo, o obxectivo agora é trasladar ese traballo aos partidos oficiais e comezar a competir ao máximo nivel desde o inicio.

Pola súa banda, o técnico do Ourense Baloncesto, Moncho López, fixo unha valoración positiva do encontro ante un Palencia que considerou “un adversario moi cualificado e que está en moi boa forma”.

O adestrador ourensán destacou especialmente a capacidade do seu equipo para competir ata o final: “É difícil perder e estar contento, aínda que sexa pretempada, pero estou orgulloso dos rapaces”.

O técnico tamén analizou o tramo final do encontro e sinalou a falta de solidez defensiva e algunhas perdas de balón en momentos importantes como aspectos a mellorar. “O partido podía decantarse por calquera dos dous lados, pero Palencia foi mellor nos últimos tres minutos e levou a vitoria”, apuntou.

Coa pretempada xa no seu tramo final, o equipo afronta agora uns días importantes de recuperación e traballo antes do debut oficial. Moncho López recoñeceu o cansazo acumulado tras estas semanas de preparación, pero insistiu na necesidade de continuar avanzando.

“O equipo está canso. Agora necesitamos descansar, pero o traballo ten que continuar”, explicou o adestrador, que tamén lembrou que o grupo aínda ten marxe de mellora e que deberá seguir traballando para chegar nas mellores condicións ao inicio da competición.

Así, o Ourense Baloncesto pon o punto final á pretempada con boas sensacións, consciente dos aspectos que debe mellorar e coa ilusión dun vestiario que xa ten a mirada posta no comezo da tempada.