Acordo de colaboración entre o COB e o CB Maside

O Club Ourense Baloncesto continúa a súa aposta polo desenvolvemento do baloncesto feminino e anuncia a sinatura dun acordo de vinculación co CB Maside, que permitirá que varias xogadoras do conxunto masidense poidan incorporarse ao equipo sénior feminino do COB, histórico referente do deporte na cidade.

Este acordo supón un novo paso na estratexia do club ourensán por crear sinerxías co resto de entidades da provincia, fortalecendo a base e ofrecendo novas oportunidades de crecemento deportivo ás xogadoras máis destacadas dos clubs colaboradores.

Desde o COB, o corpo técnico e a directiva queren agradecer ao CB Maside a súa total colaboración e predisposición, que exemplifica o espírito de cooperación necesario para seguir medrando como familia do baloncesto ourensán.

Ambas entidades expresan o seu desexo de que esta vinculación se manteña no tempo, xerando un proxecto con continuidade e beneficios mutuos. Coa incorporación destas xogadoras, o equipo feminino do Club Ourense Baloncesto reforza a súa estrutura e reafirma o compromiso de seguir sendo un referente provincial e autonómico no impulso do deporte feminino.

VOLVEREMOS, E TI XA ESTABAS