O COB inicia unha nova era: nace o “Cloud.gal Ourense Baloncesto”
O club ourensán acada un acordo estratéxico coa tecnolóxica galega para o que resta de tempada. Rafa Villaverde, CEO de Infonet e Cloud.gal, sela unha alianza que redefine a identidade do equipo baixo os valores da soberanía de datos e a innovación.
O Club Ourense Baloncesto (COB) abre un capítulo inédito na súa historia. A entidade anunciou esta mañá un acordo de patrocinio principal con Cloud.gal, a división especializada en servizos na nube do Grupo Infonet. Esta alianza non só supón un pulmón económico para o club, senón un cambio integral na súa identidade: desde hoxe mesmo, o equipo competirá na Primera FEB baixo a denominación oficial de Cloud.gal Ourense Baloncesto.
O salto tecnolóxico do COB
Cloud.gal, baixo o paraugas da experimentada consultora Infonet, consolidouse como o referente galego en soberanía de datos. Liderada polo seu CEO, Rafa Villaverde, a compañía destaca por ser o primeiro provedor cunha infraestrutura de nube privada 100% galega, priorizando a ciberseguridade e a proximidade física dos seus centros de datos.
"Este acordo é un paso natural para nós", sinala Villaverde. "En Infonet sempre dicimos que somos a nube cos pés na terra, e non hai mellor forma de demostrar ese arraigo que apoiando un dos piares do deporte e a sociedade ourensá como é o COB".
Estrea ante un grande e debut no Pazo
A nova era do Cloud.gal Ourense Baloncesto terá a súa posta de largo oficial o vindeiro 4 de xaneiro. O escenario será o Movistar Arena, onde o equipo estreará a súa nova denominación e uniforme —que lucirá o logotipo da tecnolóxica na parte traseira— nun duelo de alta voltaxe fronte ao Movistar Estudiantes.
O 10 de xaneiro será o primeiro partido do Cloud.gal Ourense Baloncesto na casa, o Pazo Paco Paz, nun derbi que o enfrontará ao Obradoiro de Santiago no primeiro partido do 2026 en Ourense.
