O Club Ourense Baloncesto incorpora a Javier Nicolau, que asina un contrato para as dúas próximas tempadas, reforzando así o xogo interior do equipo de cara ao novo proxecto deportivo. O xogador valenciano chega ao COB tras acumular unha ampla traxectoria na Primeira FEB, categoría na que se consolidou como un xogador de equipo, capaz de influír no xogo grazas ao seu traballo, á súa intelixencia táctica e ao seu carácter competitivo.
Na pasada campaña disputou un total de 30 encontros entre a Liga Regular e os Playoffs, nos que promediou 7,9 puntos e 3,8 rebotes por partido. Máis alá das estatísticas convencionais, Nicolau destacou pola súa eficiencia ofensiva, asinando un 63,1 % de porcentaxe efectiva de tiro (eFG%), un 67,5 % de True Shooting Percentage (TS%) e un 16,5 % de uso ofensivo (USG%), rexistros que evidencian a súa capacidade para producir con gran acerto e achegar ao equipo sen necesitar un elevado volume de posesións.
Entre as súas principais virtudes destacan a súa eficacia preto do aro e a excelente selección de lanzamentos, converténdose nun xogador moi fiable nas situacións de finalización. Ademais, a súa intensidade competitiva permítelle achegar en ambos os dous lados da pista, sumando presenza no rebote, dureza defensiva e un valioso traballo en todas esas accións que moitas veces non quedan reflectidas nas estatísticas.
O adestrador do Club Ourense Baloncesto, Moncho López, valorou moi positivamente a incorporación do novo xogador:
“A incorporación de Javier Nicolau supón sumar ao noso cadro de xogadores un perfil que mantivo unha traxectoria claramente ascendente desde a súa chegada á liga. É un xogador interior que medrou tempada tras tempada e que demostrou a súa capacidade para competir ao máximo nivel, disputando os playoffs nas dúas últimas campañas.
Consideramos que encaixa perfectamente na estrutura do noso xogo e que complementa moi ben aos outros xogadores interiores do equipo, achegándonos un perfil diferente e de enorme valor. É un xogador grande cunha excelente interpretación do bloqueo directo, tanto na continuación cara ao aro como na lectura dos espazos, o que lle permite xerar vantaxes para o equipo.
Ademais, representa o perfil de xogador interior moderno que buscamos: sólido preto do aro, intelixente tacticamente e coa capacidade de abrir o campo e asumir puntualmente lanzamentos desde o exterior cando a situación o require. Estamos convencidos de que a súa experiencia, o seu coñecemento da competición e a súa evolución constante contribuirán a que o noso xogo interior sexa máis versátil e competitivo.”
Coa chegada de Javier Nicolau, o Club Ourense Baloncesto incorpora un xogador contrastado na Primeira FEB, con experiencia, solidez e capacidade para fortalecer o seu xogo interior e seguir construíndo un equipo competitivo de cara á nova tempada.
