O Cloud.gal Ourense Baloncesto cae na pista do Movistar Estudiantes

O Cloud.gal Ourense Baloncesto non puido sacar un resultado positivo na súa visita á pista do Movistar Estudiantes, nun encontro no que os locais foron marcando o ritmo co paso dos minutos e acabaron impoñéndose nun partido esixente.

O choque comezou cun Estudiantes máis acertado, que colleu as primeiras vantaxes no marcador. O Cloud.gal Ourense Baloncesto reaccionou con puntos de Kentwan Smith e Romaro Gill, e foi asentándose no partido grazas ao traballo interior e á achega de Gabe Kalscheur. Aínda así, o conxunto madrileño mantivo o control e pechou o primeiro cuarto por diante (24-18).

No segundo parcial o equipo de Moncho López deu un paso adiante. A mellora defensiva e o acerto repartido permitiron reducir diferenzas, con achegas importantes de McDonnell, Isaac Vázquez, Martín Fernández e Diogo Seixas. O Cloud.gal Ourense Baloncesto conseguiu competir de ti a ti e mesmo chegou a colocarse lixeiramente por diante antes do descanso, deixando o encontro moi aberto ao paso polos vestiarios (42-43).

Tras a reanudación, o Estudiantes incrementou a intensidade e foi quen de marcar diferenzas. O Cloud.gal Ourense Baloncesto tivo dificultades para conter o ritmo local e encaixou un parcial que abriu fenda no marcador. A pesar dos intentos de Okanu e Gabe por manter ao equipo no partido, os locais foron ampliando a renda durante o terceiro cuarto (74-57).

No último período, o Cloud.gal Ourense Baloncesto intentou reducir diferenzas, pero o Estudiantes soubo xestionar a vantaxe con solvencia. O esforzo colectivo non foi suficiente para cambiar a dinámica dun encontro que xa quedara encarrilado, pechándose finalmente coa derrota ourensá no Movistar Arena (92-75).

Podes ver a rolda de prensa de Moncho López a continuación

Fotos: Movistar Estudiantes